ସ୍କୁଲକୁ ବହି ଆଣିବାକୁ ଯାଇ ଆଉ ଫେରିଲେନି ୨ ଛାତ୍ର
ପିପିଲି: ପୁଣି ଦୁଇ ସ୍କୁଲ ଛାତ୍ର ନିଖୋଜ। ପିପିଲି ଥାନା କମଳାସାଗର ପାଟଣା ଗ୍ରାମର ଦୁଇ ସ୍କୁଲ ଛାତ୍ର ନିଖୋଜ ହୋଇଛନ୍ତି। ଏନେଇ ପରିବାର ପକ୍ଷରୁ ପିପିଲି ଥାନାରେ ଅଭିଯୋଗ କରାଯାଇଛି। ଦୁଇ ଜଣ ଛାତ୍ର ହେଲେ ଗ୍ରାମର ପବିତ୍ର ଦାସଙ୍କ ପୁଅ ନିରଞ୍ଜନ ଦାସ ଓ ଅନ୍ୟ ଜଣେ କେଦାର ବେହେରାଙ୍କ ପୁଅ ସୂର୍ଯ୍ୟକାନ୍ତ ବେହେରା। ଗତକାଲି ସକାଳୁ ଘରୁ ସାଇକେଲ ନେଇ ସ୍କୁଲକୁ ବହି ଆଣିବା ପାଇଁ ଯାଇ ଆଉ ଫେରିନାହାନ୍ତି ଦୁହେଁ।
ତେବେ ଥାନାରେ ନିଖୋଜ ସମ୍ପର୍କରେ ଅଭିଯୋଗ ପରେ ପିପିଲି ପୋଲିସର ଏକ ଟିମ ଆଖପାଖ ଅଞ୍ଚଳରେ ଖୋଜାଖୋଜି ଜାରି ରଖିଛି। ଅନ୍ୟପଟେ ଦୁଇ ଛାତ୍ର ନିଖୋଜ ସମ୍ପର୍କରେ ଖଣ୍ଡିମଙ୍ଗଳପୁର ସ୍କୁଲର ପ୍ରଧାନ ଶିକ୍ଷକ ମହେଶ୍ୱର ପ୍ରଧାନଙ୍କୁ ଫୋନରେ ଯୋଗାଯୋଗ କରାଯାଇଥିଲା। ତେବେ ପିଲା ନିଖୋଜ ହେବା କଥା ଜାଣିଥିବା କହିଛନ୍ତି ସ୍କୁଲର ଶିକ୍ଷକ। କିନ୍ତୁ ସେମାନଙ୍କୁ ସ୍କୁଲ ପକ୍ଷରୁ ବହି ଦିଆଯିବା ନେଇ ଡକା ଯାଇନଥିଲା ବୋଲି କହିଛନ୍ତି ଶିକ୍ଷକ।
